புலிகள் விமர்சனங்களுக்கு அப்பாற்பட்டவர்களா?

ஒரு நாட்டை விமர்சிக்கின்றோம், ஒரு அரசை விமர்சிக்கின்றோம், ஒரு தலைவரை விமர்சிக்கின்றோம் ... புலிகளை விமர்சிக்க முடியாதா? என்று நீங்கள் கேட்கக்கூடும். அப்படித்தான் நானும் நினைத்திருந்தேன்.

ஜனநாயக நடைமுறைகள் பின்பற்றப்படும் எவ்விடத்திலும் யாரும் இவ்வாறுதான் சிந்திப்பார்கள், சிந்திக்க முடியும்.

புலிகளின் தமிழ் மக்களுக்கான போராட்டம் உண்மையானது என்பதுவும் நியாயமானது என்பதுவும் ஏர்றுக்கொள்ளக்கூடியதே. அதில் மாற்றுக் கருத்து எதுவும் கிடையாது. இது எவ்வளவுக்கு எவ்வளவு உண்மையானதோ அவ்வளவுக்கவ்வளவு அவர்கள் நடைமுறை பற்றி எனக்கு விமர்சனங்கள் உண்டு என்பதுவும் உண்மையானது.

இது அவர்களைப்பற்றிய விமர்சனங்களோ கேள்விகளோ அல்ல. புலிப்பினாமிகள் என்ற போர்வையில் அல்லது அவர்களின் ஜால்ராக்கள் என்ற கோதாவில் பதிவுகளில் வந்து எச்சமிட்டுப்போகும் சில அறிவிலிகளைப்பற்றியதே.

உங்களால் எங்களால் ஒரு சிங்கள அரசையோ ஒரு இந்திய அரசையோ சோனியாவையோ கலைஞர் மு.க வையோ விமர்சிக்க முடியும் என்றால் அது ஜனநாயகம் என்றால் பத்திரிகைச் சுதந்திரமென்றால் -இந்த அறிவிலிகள் இவ்வாறு எச்சமிட்டுச் செல்வதை எந்த வகையில் சேர்ப்பது?

"புலிகளின் முடிவு காலமா?" என்ற எனது ஆக்கத்தில் ஒன்று வந்து இது ஒரு தமிழ் ப்ளொட் (புளட் அல்ல -இரத்தம்) ஆக இருக்க முடியாது என்று கண்டு பிடித்துப் போயிருக்கின்றது. உனது தாயும் தந்தையும் தமிழராய் இருப்பதால் நீ எவ்வாறு தமிழன் என்று சொல்லிக்கொள்கின்றாயோ அதற்கும் மேலாக தமிழைச் சுவாசிப்பதால் நான் தமிழன் என்று உணர்கின்றேன்.

அதேபோல "புலி அடியும் கிலி பிடிக்கும் சிங்களமும்" என்ற வீடியோ இணைப்பில் வந்து ஒன்று உங்கள் வாசகர் கவர்ச்சிக்காக புலிகளை இழுக்காதீர்கள் என்கின்றது.

இதனால் தான் எனக்கு இந்தச் சந்தேகம் எழுந்திருக்கின்றது. நான் என்றாலும் "களவாணி" என்ற பெயரில் எழுதுகின்றேன். எனது இடத்திற்கு நீங்கள் வருகின்றீர்கள். எச்சமிடுகின்றீர்கள். நீங்கள் மட்டும் அனானியாக வருவதேன். உங்கள் பெயர் எங்களுக்குத் தெரியவேண்டுமென்பதல்ல. உங்கள் தளத்தைக் குறித்துச் செல்லுங்கள். நாங்களும் வந்து பார்க்கின்றோம் நீங்கள் என்ன உலக மகா சேவை செய்கின்றீர்கள் என்பதை.

புலிப்பாசிசம் புலி அராஜகம் என்று பகிரங்கமாக உங்களை விமர்சிப்பவர்களிடம் உங்கள் எதிர்க்கருத்துக்களை எப்போதாவது பதிவு செய்ததுண்டா? அது தானே ஜனநாயகம்..கருத்துப்பரிமாற்றம் ... கருத்துத் தெளிபு.

மண்டைக்குள் ஒன்றும் இல்லாதவர்களே இவ்வாறு எச்சமிடுபவர்கள் என்பது எனது கருத்து. ஒரு ஆக்கத்தைப்பற்றிய உங்கள் கருத்தைப்பதிவு செய்வது வேறு. அதைச்செய்யாதீர்கள் இதைச்செய்யாதீர்கள் என்று கட்டளை இடுவது வேறு.

இவ்வகையில் நீங்கள் ஒரு வித எதேச்சாதிகாரத்துடன் செயற்படுவதை உங்களால் புரிந்து கொள்ள முடிகின்றதா? புலிகள் உங்களிடம் தங்களைகுத்தகைக்குத் தந்து விட்டார்களா?

அப்போது புலிகள் ஈழத்தமிழ் மக்கள் அனைவருக்குமான அமைப்பு இல்லையா? எங்களை அவர்களைப்பற்றி எழுதக்கூடாது என்ற அதிகாரத்தை உங்களுக்குத் தந்தவர்கள் யார்?

புலிகளைக் கேள்விகள் இன்றி கண்மூடித்தனமாக ஆதரிப்பதாகப் பாசாங்கு செய்யும் நீங்கள் தான் அவர்கள் சகாப்தம் (ஒரு வேளை) முடிந்தால் முதல் கல்லை வீசப்போபவர்களும் என்பது எனது முடிபு.

ஏனெனில் எதையுமே கேள்வி கேட்காது நம்புவர்கள் அவர்களைப்பற்றிய எதிரான கருத்தையும் அப்படியே நம்புவார்கள்.

உங்களுடைய இத்தகைய எதேச்சாதிகாரம் தான் இன்று எத்தனையோ எம்மக்களை விடுதலைப்போராட்டத்தை விட்டு ஓரங்கட்டியிருக்கின்றது என்பதைப்புரிந்து கொண்டிருக்கின்றீர்களா?

உங்களுடைய இத்தகைய அராஜகங்கள் தானே எம்மக்களைத்தாம் வாழும் நாடுகளில் உங்களுக்கெதிராக மக்களை காவல்துறையிடம் முறைப்பாடு செய்ய வைத்திருக்கின்றது.

இவர்களையெல்லாம் மனமொப்பாமலேயே இவ்வகையில் நடக்கத்தூண்டியது யார்?

அவ்வகைக்காரணங்களும் புலிகளை இந்நாடுகளில் தடை செய்ய வலுச்சேர்த்தது என்பதை மறுதலிக்கின்றீர்களா?

இத்தகைய துயர வேளைகளிலும் உங்கள் காட்டுமிராண்டித்தனமான தர்ப்பாரை நீங்கள் முடிவுக்குக் கொண்டு வரமாட்டீர்களா?

தமிழ் மக்களாக தமிழீழப் போராட்டத்தை ஆதரிக்கும் நேசிக்கும் மக்களின் வேண்டுகோள் இது என்பதைபுரிந்து கொள்ள மாட்டீர்களா?

கேள்வி கேட்பவன் கருங்காலி உங்கள் பாசையில் . எதேச்சாதிகார முகமூடியைகழட்டி விட்டு உங்கள் அசிங்கம் பிடித்த முகத்தைப் பாருங்கள்.
திருந்துவதற்கு ஒரு வாய்ப்பு வரக்கூடும்.

அமெரிக்க - இந்திய பயங்கரவாதிகள்

அண்மையில் ஒரு செய்தி வெளியாகியிருக்கின்றது. அமெரிக்காவில் வாழும் மெத்தப்படித்த இந்தியர்கள் கூட்டாகச் சேர்ந்து அமெரிக்க அரசிற்கு ஒரு மகஜர் கொடுத்திருக்கின்றார்கள். 16 ஆயிரம் பேர் கையெழுத்திட்டிருக்கின்றார்கள்.

பாகிஸ்தானிற்கு வழங்கப்படும் அமெரிக்க உதவிகள் நிறுத்தப்படவேண்டும். அல்லது பயங்கரவாதம் நிறுத்தப்படவேண்டும் என்ற முன் நிபந்தனை வலியுறுத்தப்பட்டு உதவிகள் வழங்கப்படவேண்டும்.

அமெரிக்காவில் இருக்கும் இந்தியர்களில் பெரும்பான்மையானோர் மெத்தப்படித்தவர்கள், அறிவாளிகள். அதே நேரம் மனிதாபிமானம் உள்ளவர்களா ? என்பதே எமது கேள்வி.

அமெரிக்கப்பிரதிநிதிகள் சபை வெளிநாடுகளுக்கும் வெளிநாட்டு அமைப்புகளுக்குமான உதவிகள் எவ்வாறு அமையவேண்டுமென மறு பரிசீலனை செய்யும் தருணம் இது. புதிய அரசு பயங்கரவாதத்திற்கு எதிரான போரில் திருத்தம் கொண்டுவர முயல்கின்றது.

அந்தச் சந்தர்ப்பத்தில் தான் அமெரிக்க வாழ் இந்தியர்கள் இந்த மகஜரை பிரதிநிதிகள் சபையிற்கும் அரசிற்கும் அளித்துள்ளார்கள். அல்ஹைடாவிலிருந்து அனைத்து முஸ்லீம் தீவிர வாத அமைப்புகளும் பாகிஸ்தானில் முகாமிட்டிருப்பதாகப் பட்டியல் இட்டிருக்கின்றார்கள்.

பாகிஸ்தானில் முஸ்லீம் தீவிர வாத அமைப்புகள் உருவாகுவதற்கே இந்தியா தான் காரணம் என்பதை இந்த மெத்தப்படித்த மேதைகளுக்கு யாராவது நினைவூட்டுங்கள். அதற்கு கொஞ்ச காலம் பின்னோக்கிப் போக வேண்டும்.

1947 இந்தியா பாகிஸ்தான் இரண்டு நாடுகள் உருவாகிய நேரம். பாகிஸ்தானும் இந்தியாவைப்போன்ற மிகச் சாதரண நாடு. சாமானியர்களால் உருவான தேசம்.
அப்போதெல்லாம் அங்கு பயங்கரவாதிகள் யாரும் கிடையாது.

உண்மையில் பாகிஸ்தான் , இந்தியா , காஸ்மீரம் என்று மூன்று நாடுகள் உருவாகியிருக்க வேண்டிய நேரம். காஸ்மீரின் துரதிர்ஸ்டம் அங்கு அப்போது இந்து மன்னன் ஆட்சி புரிந்து கொண்டிருந்ததும் வல்லபாய் பட்டேல் என்ற இரும்பு மனிதர் நேருவின் பக்கபலமாக இருந்ததும் இந்தியர்களுக்கு இயல்பாகவே இருக்கின்ற பேராசையும் (இந்த பேராசைக்கு நிறையவே உதாரணம் தருகின்றேன்) காஸ்மீரத்தில் மண்ணின் மைந்தர்களின் குருதி தொடர்ந்து பாச்சப்படவேண்டும் என்று எழுதியாகி விட்டது.

இன்று வரை ஐ .நாடுகளின் யோசனையைக்கூட உதாசீனப்படுத்தியது இந்தியா தான். இந்தியா நினைத்தால் காஸ்மீரைச் சுதந்திரமாக வாழ விடலாம் என்பது எனது மட்டுமல்ல உலக அரசியல் ஆய்வாளர்களின் கருத்தாகும்.

இந்தியாவால் ஆக்கிரமிக்கப்பட்ட அக்காஸ்மீரின் விடுதலையை வேண்டியவர்களின் தோற்றுவாய் இன்று பாகிஸ்தானை இன்றுள்ள நிலைக்குக் கொண்டுவந்தது துரதிர்ஸ்டமே. அதே போல் ஆப்கானிஸ்தானில் நிலைகொண்ட சோவியத் ஆதரவு அரசை அகற்ற அமெரிக்கா எடுத்த நிலைப்பாடு இன்று ஆப்கானிஸ்தானையும் பாகிஸ்தானையும் பயங்கரவாதத்தின் பிடியில் பூரணமாகக் கொடுத்திருக்கின்றது.

அதே போல இதே பாகிஸ்தானை நலிவடையச் செய்ய வேண்டி பங்களாதேசத்தின் முத்தி வாகினி போன்ற அமைப்புக்களை ஆயுதமும் பயிற்சியும் கொடுத்து வளர்த்து விட்டதும் பாகிஸ்தானைப்பிளவு படுத்தி பங்களாதேசத்தை உருவாக்கி விட்டதும் இந்தியர்களின் பேராசையே.

அதே போல ஈழத்தில் கொழுந்து விட்ட விடுதலைப்போராட்டத்தை ஆயுதம் பயிற்சி என்ற ஆசைகளைக்காட்டி திசைதிருப்பி விட்டதும் இன்றைய ஈழத்தவரின் அனைத்து அவலங்களுக்கும் காரணம் இதே இந்தியர்களின் பேராசை.

பிராந்திய வல்லரசுக்கனவு என்ற மாயையின் பின்னால் ஓடும் இந்தியர்கள் அனைத்து மனித விழுமியங்களையும் தங்கள் காலடியில் போட்டு மிதித்துக் கொண்டு செல்கின்றார்கள் என்பதை யாராவது இவர்களுக்குச் சொல்லுங்களேன்.

அமெரிக்கா வாழ் மெத்தப்படித்த இந்த இந்தியர்கள் இன்று வன்னிக்காடுகளில் ஓடும் இரத்தத்தின் பின்னால் சோனியாவின் இந்திய அரசு நிற்பதை எவ்விதம் பார்க்கின்றார்கள். இந்த அரச பயங்கர வாதம் பற்றி இவர்கள் கண்டறிந்தது என்ன?

பயங்கர வாதத்தை ஆதரிப்பவர்கள் யாராய் இருந்தாலும் அவர்களும் பயங்கர வாதிகளே - என்பது அமெரிக்காவின் அதிரடி கண்டு பிடிப்பு.

இனவிடுதலைப்போராட்டமும் அமெரிக்காவின் வசதிக்கேற்ப பயங்கரவாதப்பட்டியலில் சேர்க்கப்பட்டுள்ளது . இனவிடுதலை அடைந்த வியற்நாம் , கியூபா முதல் இனவிடுதலை வேண்டிப்போராடும் ஈழத்தமிழர்கள் வரை இதற்கு உதாரணங்கள்.

இந்தியாவின் அரச பயங்கரவாதத்தை ஆதரிப்பவர்களும் அத்தகைய அரசமைப்பைக் காத்துக்கொள்ள மகஜர் கொடுப்பவர்களும் பயங்கர வாதிகள் தானே. இப்போது தலைப்பை இன்னுமொரு முறை படித்துப்பாருங்கள்.

(நீதியின் பால் செயற்படும் ஆதரவளிக்கும் இந்தியர்கள ,அமெரிக்கர்கள், இந்திய-அமெரிக்கர்கள் பற்றி எங்களுக்கு உயர்ந்த அபிப்பிராயம் இருக்கின்றது. )

புலி அடியும் கிலி பிடிக்கும் சிங்களமும்

புலிகளின் தாக்குதல் விசுவமடு
eelam video @ Yahoo! Video

சோனியா கருனா கினியும் போயஸ் தோட்டத்து கூர்க்காவும்

என்னத்த சொல்லுரது போங்க .. ஊரில ஒரு வழக்குச்சொல்லிருக்குதுங்கோ "ஆட்டைக்கடிச்சி மாட்டைக்கடிச்சி.. " அப்புறம் காலம் நேரம் பாத்து நீண்டிகிட்டிப்போகுங்கோ.நம்ம அரசியல் வாதிங்க பொழப்பும் அது போலத்தான்.

" ஈழத்தமிழங்கென்னெல்லாம் ஒண்ணுங்கெடையாது லங்கைதமிழங்கன்னுதான் கூப்பிடனும்" (நாங்க இவங்ககிட்ட கேட்டமான்னு உதார் வுடக்கூடாது) அவங்க சொல்லுராங்க நாங்க கேட்கனும். அப்பிடித்தான் தமிழ் நாட்டு ஜனங்க சொல்லிக்கொடுத்திருக்காங்க அவுங்களுக்கு..

"அப்பிடித்தாம்பா வாரு நடக்கிரப்போ இம்மாம் ஜனங்க சாவுராங்கன்னு குய்யோ முறையோன்னு காமடி பண்ணுரவங்களுக்கு ஒரு தெளிபு வரணும்னுதா வாரு நடக்குர இடத்தில்கீர ஜனங்க சாவத்தான் செய்வானுங்கன்னு வெளக்கம் கொடுத்ததும்."

ஜதார்த்தம்னு ஒண்ணிருக்கு கண்ணூ ..அதப்புரிஞ்சுக்க்ச்ணும் இல்லாட்டி இப்பிடித்தான் குந்திக்கினு ஒப்பாரி வெக்கணும்..

எம்மாம் பெரிய தலிவருங்க அவங்க சொன்னா செரியா இருக்காதா.. இல்லாங்காட்டி இத்தன பெரீய சோமாரிங்களையும் கேப்மாரீங்களையும் வெச்சு தன்னாந்தனியாக்காட்டியும் அரசியல்ல குப்பை கொட்ட முடியுங்களா?

நாம கவனாமால்லாட்டி கால்ல வுழுவுறவன் காலை வாரி விடமாட்டானா?

இதெல்லாம் புரிஞ்சுக்காமலயா .. சோனியா என்னா பதிவிரதயா? கருனாநிதின்னா கம்னாட்டியான்னு ? அறிக்கைவுடறாங்க..

அடப்போப்பா இதெல்லாம் தெரியாமயா தனித்தமிழ் நாட்டில கெளரவ பிரஜைங்கின்னு குந்திக்கினு இருக்கோம்னு நீங்க சூடாவுறது புரியுதுங்க..

சூடாவீதிங்கப்பா ... என்னா வெயிலு கொளுத்திப்போட்டாலும் சூடேவாவாம்ம சொரணையே காட்டாத ஜென்மங்களாத்தானே நாம இரிக்கோம்னு நீங்க புலம்பிரது நமக்கும் வெளங்கிதுங்கோ ...

என்னா செய்யிரது.. படைச்சவன் எழுதிருக்கான் நெத்தில .. அவன் தான் சொல்லிருக்கான் நாமம் போட்டுக்கன்னு...

இதுக்கு மேல என்னா செய்ய முடிம்ம்னு நீங்க புலம்பிரீங்க ...

அது செரிதாம்பா.. உங்க மகமாயி உன்ணா வெரமிருந்தாங்களே.. சிங்களவன் சொல்லிப்பிட்டான் ஒன்ணும் வேலைகாவதுன்னு...

உங்க மாரியாத்தாவுக்கு தோல்வியே கெடையாதுங்களே ..எப்பிடீ இதயெல்லாம் செரிச்சுக்கப்போராங்களோ...

பேப்பரூ நியூஸுல்லாம் பக்கத்துல வச்சுப்புடாதீங்கப்பூ... தேர்தலு ஜூரத்தில இருக்கிராவுக... ஜன்னி கின்னி புடிச்சிரப்போவுது....

சிங்களவன தூக்கிப்பிடிச்சிருந்தாக .. இன்னைக்கு சிங்களவனே கால்ல போட்டு தேச்சுப்புட்டான் இந்தம்மாவ..

என்னா பண்ணுரது ..சோனியாவப்பேசலாம் கருனா நிதியை மிதிக்கலாம் அதெல்லாம் இந்தியக் கினிங்க... அனா சிங்களவன் இருக்கானே அவன் பொல்லாத பன்றிங்க...

தீனி போடுமட்டும் வாலை வாலை ஆட்டுவான்.. இல்லைன்னா உங்களயே தீனியாக்கிடுவான்..

"சும்மா புலம்பாதப்பா .. நம்ம அம்மான்னா என்ன சும்மாவா... சோவு சுப்பிரமணிசாமின்னு இப்போத்தான எஸ் எம் எஸ்ஸு சேதி போயிருக்கு ..அப்புரம் தான் இருக்கு மகிந்தவுக்கு பேதிஸ்ஸுன்னு .."

இது போயஸ் தோட்டத்து கூர்க்கா சொன்னதுங்க...

ஞாயிறு சங்கல்பம்

ஞாயிறு ஓய்வு நாளும் அதுவுமா செய்வதற்கு ஒன்றும் இல்லாது விட்டத்தைப் பார்த்துக்கொண்டு உட்கார்த்திருந்தேன்.

"உள்ளே வரலாமா ?" அசரீரி கேட்டு திரும்பிப்பார்த்தேன். நண்பன் நின்றிருந்தான். இரண்டு வீடு தள்ளிக்குடியிருப்பவன். நினைத்தபோது ஒரு எட்டு எட்டிப்பார்த்துவிட்டுப் போவான்.

"வரவேண்டாம் என்றால் போய்விடவா போறாய்... சரி சரி உள்ளே வா" என்று அழைத்தேன்.

வந்தவன் உட்காரமுன்னர் ஒரு குண்டை அள்ளிப்போட்டான்.

"டோலர்' கள் இப்போல்லாம் பிழைப்பு வாதம் புலிப்பாசிசம்னு எல்லாம் இப்போ எழுதிறதில்லையாம் ... தினமணியில செய்தி போட்டிருக்கான் "

காலையிலயே ஒன்லைன் பேப்பர்லாம் பிரிச்சு மேஞ்சிடுற என் கிட்டேயா?

ஆனாலும் குறுக்கு மூளைக்காரன். நான் தான் "களவாணி"ன்னு குத்து மதிப்பா கண்டுபிடிச்சிருக்கிறவன்.

"அப்பிடியா எந்த ஊர் தினமணியில நீ பார்த்தாய்? "

சிரித்துவிட்டு வேற டாபிக்கிற்குத் தாவினான்.

"இந்தியாவே தேர்தல் ஜூரத்தில நடுங்கிட்டிருக்கு "
"ஆமா"
"தமிழ்நாட்டில ஆவது ஏதாவது செய்யணும்டா.."
"என்ன புரட்சிகரமான வழியிலயா?"

என் குறும்பை புரிந்து கொண்டவன்

"அப்படியில்லடா .. ஈழத்தமிழர் பிரச்சினைல பொங்கியிருக்கிற ஜனங்களை அப்பிடியே டைவேட் பண்ணி தமிழ்நாட்டில ஏதாவது மாத்தம் கொண்டருணும்டா"

அவனை ஏற இறங்கப்பார்த்து விட்டு

"என்னடா தனித் தமிழ் நாடு போராட்டம் தொடங்கிடலாமா? "

"ஒரு ஈழம் போதாதா ? சாகும் வரை நம்மை நிம்மதியில்லாம கொன்னுபோட.. இது வேறைடா"

என்ன என்பதைப்போல அவனைப்பார்த்தேன்.

"இதே தமிழ் உணர்வுள்ளவங்களை ஒவ்வொரு தொகுதியிலயும் சுயேச்சயா நிப்பாட்டணும் ... இப்போ இருக்கிற ஈழ ஆதரவுப் பேரவை கிளர்ந்தெழுந்திருக்கிற மாணவர்கள் லாயர்கள் சினிமாபேர்வழிங்கள்ன்னு எல்லாரையும் இவங்களுக்கு ஆதரவாப் பேச வைக்கணும். "

"பேசவைச்சிட்டா மட்டும் ...."

என்னை இடைமறித்துதொடர்ந்தான்.

"பேசமட்டும் வைப்போம் அப்ப மக்கள் என்ன நெனைக்கிராங்கன்னு தெரிஞ்சிடும் ..... அதுமட்டுமில்ல மக்கள் மாறனும் மாறனும்னு சொல்லிக்கிட்டிருக்கிறோம்ல ..அவங்களுக்கும் ஒரு சான்ஸ் கொடுக்கணும்லே... "

அவன் யோசனை கிறுக்குத்தனம்னு பட்டாலும் அதில இருந்த ஞாயம் சரியாகவே பட்டது.

"சரி ஒரு கதைக்கு இதெல்லாம் சாத்தியம்னு வைச்சுக்கிட்டு இவங்க எல்லாத்தையும் ஜனங்க வெற்றி பெற வைச்சாலும் .. அதுக்கப்புறம் என்னா? "

என் கேள்வியைப் புரிஞ்சு கொண்டானோ என்னவோ .. எனக்கு மட்டும் புரிஞ்சா கேள்வி கேட்டேன். ஏதோ கேக்கணும்னு கேட்டு வைச்சேன்.

" வெற்றி தோல்வி இல்ல இங்க முக்கியம் ...தன்னிஷ்டப்படி ஊரை அடிச்சு உலையில போடுற ஒவ்வொரு அரசியல் வாதிக்கும் பயம் வரணும்...

ஜனங்க கோபப்பட்டா நாமல்லாம் நெலைச்சிருக்கவே முடியாதுன்னு... அது மட்டுமில்ல கொஞ்சமாவது ஜனங்களுக்கு நல்லது செய்யவேனும்னு நெனைப்பிருக்கும்... "

சொல்லிவிட்டுச் சிரித்தான். என் யோசனையைப்பார்த்து விட்டுக்கேட்டான்.

"என்னடா யோசனை..'
"ஒண்ணுமில்ல உனக்கு ஐடியா அரசன்னு பட்டம் கொடுக்கலாமான்னு யோசிச்சுக்கிட்டிருக்கேன்..."

"அப்பிடியா.. இதையும் கேட்டிட்டு அப்புறம் சொல்லுடா... இது கூட முடியல்லன்னா பரவாயில்லை அட்லீஸ்ட் ஒவ்வொரு கட்சித் தலைவருங்க கேக்கிர தொகுதியில் எல்லாம் நம்மாளுங்களை நிறுத்தி அவங்களையெல்லாம் தோக்க வைக்கணும்... அப்படீன்னா தலைவருங்க எல்லாம் அரண்டு போயிடுவாங்கடா..இதையொரு சங்கல்பமாய் எடுத்துக்கணும்டா"

சொல்லி விட்டு என்னைப்பார்த்தான். அவர்கள் அரண்டு போகிறார்களோ இல்லையோ நான் அரண்டு போனேன்.

கப்டன் " ஸீரோ"

கப்டன் "ஸொரோ" பற்றி நீங்கள் கேள்விப்பட்டிருபீர்கள் கயிறுகளில் தாவி குதிரைகளில் ஓடி வாள் சுழற்றும் சாகசமும் வாள் நுனியில் "z" கீறப்ப்டும் அதிசயமும் இன்றும் பெரியவர்களையும் குழந்தைகளாக்கி விடும். கொள்ளையடித்த பணத்தை ஏழைகளுக்கு கொடுத்துதவும் காருண்ணியத்தின் மூலம் எங்கள் மனங்களில் நாற்காலி போட்டு உட்காரும் பலம் அந்த காரக்டருக்கு உண்டு.

அது போலவே தமிழ்த்திரையரங்கில் மின்னிய விஜயகாந்தும் தனக்கான ரசிகர்களை உருவாக்கிக்கொண்டார். ஏழைகளைத் துயரப்படுத்தும் வில்லன்களை துவம்சம் செய்யும் போது திரையரங்கு அதிரும் "டும் .... டுஷ்ஷும்" அதிர்வுகளில் நம் கையாலாகாத் தனங்களையும் மீறி நம் கைகளும் முறுக்கெடுத்துக் கொள்ளும்.

எம்மைத் துன்பப்படுத்திய அவமானப்படுத்திய எத்தனை கயவர்களை அச்சந்தர்ப்பங்களில் நாமும் துவைத்து தும்பெடுத்திருப்போம் மானசீகமாக.

ஏழை பங்காளன் சமூக சீர்திருத்தவாதி இந்தியன் தமிழ்க்காவலன் எத்தனை வேடங்கள் ..அப்பாவி இளைஞர்களை அவர் பின்னால் திரட்டிச்சென்றது. கூட்டம் கூடக்கூட ஆசையும் கூடிச்செல்லும் போலும்.

சினிமா புகழ் மேவி அரசியல் அதிகாரமும் தேடிப்போக அவரைத் தூண்டி விட்டது.

அதர்மத்தைத் தட்டிக்கேட்கும் பாங்கும் "தமிழ தமிழ தமிழா... " என்ற பாடல் மூலம் தமிழ் உணர்வாளனான பாங்கும் நூறு ஆயிரமாக தமிழ் இளைஞர்களை அவர் பின்னால் அணிவகுத்துச் செல்லச்செய்தன.

'கப்டன்" என்ற பட்டப்பெயருடன் நெஞ்சுயர்த்தி அவரை முன்னால் செல்லவைத்து ஒரு உண்மையான உணர்வுள்ள கூட்டம் அவர் பின்னால் என்றும்.

அ.தி.மு.க , தி.மு.க விற்கு மாற்றாக என்ற பேனருடன் தே.மு.தி.க களம் இறங்கியது. இப்பெருங் கொள்ளைக்காரருடன் எப்போதுமே கூட்டு இல்லையென்ற பெருங்கோஷத்தை கேட்கும் மன நிலையில் மக்கள் இல்லையென்பதோ அல்லது பெருங் கொள்ளையரின் அரசியலை மாற்றீடு செய்யும் இராஜதந்திரம் தெரியாத தன்மையோ கப்டனால் பிரகாசிக்க முடியவில்லை. காசு கரைந்தது தான் மிச்சம்.

அரசியலை விரும்பிய கப்டனால் வெல்ல முடியாத தேர்தல்களை விரும்ப முடியவில்லை. ஹவுஸ்புல் தியேட்டர்களையே பார்த்துப்பழகியவருக்கு பாதியும் நிறையாத ஓட்டுப்பெட்டிகளைச் சகிக்க முடியவில்லை.

ஆறிய கஞ்சி பழங்கஞ்சியாகி பத்தோடு பதினொன்றாகி கொடியரசியல் செய்ய வேண்டுமோ என்ற தன்னிரக்கமும் பதட்டமும் கப்டனைத் தொற்றிக் கொண்டது.

தேர்தல் அறிவிப்பு வந்ததும் கப்டனை தூங்கவே விடாது அது துரத்திக் கொண்டிருக்கின்றது. இரு பெரும் பெருச்சாளிக்கட்சிகளான அ.தி.மு.க, தி.மு.க வுடன் கூட்டுச் சேர்ந்தால் ம.தி.மு.க , பா.ம.க போல் ஆட்சிக்கனவு அடிபட்டுப்போகும் . அதை விட்டால் கருப்பாகவும் வெள்ளையாகவும் வாங்கியது எல்லாம் கரைந்து போகும்.

கட்சிகள் எல்லாம் கூட்டணியை அறிவித்து தேர்தல் தொகுதிகளையும் பிரித்துக் கொண்டபோதும் இவரால் இன்னும் எந்த முடிவுக்கும் வரமுடியவில்லை.

ஈழத்தமிழ் ஆதரவு கொதித்துக் கொதி நிலையாக இருக்கும் போது காங்கிரசை ஓரங்கட்டும் மும்முரத்தில் தமிழக மக்கள் வேறுபாட்டைத்துறந்து வேள்வியில் இறங்கியிருக்கும் போது கப்டனின் நகர்வு வேறாக இருக்கின்றது.

ஆட்சி மேடை ஏறும் வெற்றுக்கனவில் மிதக்கும் காங்கிரசுடன்
கூட்டுச் சேர்ந்து ஆட்சியமைக்கும் முஸ்தீபில் இறங்கியிருப்பதாக அரசல் புரசலாகச் செய்திகள் கசிந்து கொண்டிருக்கின்றன.

யாரோ எழுதிய வசனங்களைப்பேசிக்கைதட்டல் வாங்கிய கப்டன் சொந்த டயலாக்கில் சொதப்பத் தொடங்கியிருக்கின்றார்.

தமிழகமே காங்கிரசைப்புறம் தள்ள எழுச்சி கொள்ளும் போது அக்காங்கிரசை ஆட்சியில் ஏற்றிவிட முயலும் கப்டனை "தமிழனாக" ஏற்றுக்கொள்ள முடியவில்லை.

"தமிழ் நாட்டில் வெற்றி கொள்ள இந்தியனாய் இருப்பதை விட தமிழனாக இருக்க வேண்டும்" என்ற சின்ன சூத்திரம் கூடத் தெரியாத இவர் "கப்டன் ஸீரோ" தானே.

பிழைப்பு வாதமும் "பித்த" வாந்தியும்

புலியெதிர்ப்பு வாதம் பாஸிஸம் பற்றியெல்லாம் எழுதி வந்த நம் "டோலர்கள்" இப்போது பிழைப்பு வாதம் என்ற புதிய பரிணாம வளர்ச்சியை அடைந்திருக்கின்றார்கள்.

முடக்கு வாதம் இடக்கு வாதம் என்ற வாதங்களுள் "பிழைப்புவாதம்" என்ற புதிய தமிழ்ச்சொல்லைக்கண்டு பிடித்து தமிழுக்குப் பெருமை சேர்த்திருக்கின்றார்கள் இந்த "டோலர்"கள்.

தமிழக அரசியல் வாதிகளை சொற் சாட்டை கொண்டு விரட்டும் இவர்கள் தமிழ் ,தமிழினவுணர்வு என்பவற்றைக்கொண்டு முகமூடி போட்டு பிழைத்துக் கொள்வதாகவும் கூலிக்குழுக்களை உருவாக்குவதாகவும் குற்றம்சாட்டும் இவர்கள் இருப்பதுவும் அதே "தமிழ்" அரங்கம் தான்.

புலி ஆதரவுப்பிழைப்பு வாதம் புலியெதிர்ப்பு பிழைப்பு வாதம் என்று ஈழ ஆதரவு /எதிர்ப்பு போராட்ட வாதிகள் அனைவரையும் அக்மார்க் முத்திரை குத்திப்புறம் தள்ளுகின்றார்கள்.

//ஆயுதம், பணம், பயிற்சி, அரசியல் என்று, ஒரு இனத்தின் சொந்தப் போராட்டத்தை தடுத்து நிறுத்தி, வெறும் கூலிக் குழுக்களின் போராட்டமாக ஈழ ஆதரவு என்ற பெயரில் சிதைத்தனர். இப்படி உருவான கூலிக் குழுக்கள், சொந்த மக்களை ஒடுக்கத் தொடங்கியது.//

ஆயுதம் பணம் பயிற்சி அரசியல் என்பவற்றைக்கொடுப்பதன் மூலம் அல்லது போராடும் குழுக்கள் அவற்றைப்பெறுவதன் மூலம் எவ்வாறு ஒரு இனத்தின் போராட்டத்தை தடுத்து நிறுத்த் முடியும் என்பது புரியவில்லை. இவ்வுதவிகள் ஒரு ஆரம்பக்கட்டத்தில் ஈழத்து இயக்கங்களால் பெறப்பட்டனவேயன்றி பின் நாட்களில் சொந்த முயற்சியிலேயே இயக்கங்கள் வளர்ந்தன.

வியற்நாம் கியூபா பலஸ்தீனம் போன்ற 'விடுதலை" பெற்ற நாடுகளிலேயோ அல்லது விடுதலை வேண்டிய போராட்டத்தில் தொடர்ந்திருக்கும் நாடுகளிலேயோ உள்ள போராளிகளாலும் இத்தகைய உதவிகள் வேறு அமைப்புகளிலிருந்தோ நாடுகளிலிருந்தோ பெறப்பட்டேயிருந்தன. அதனால் அவர்கள் போராட்டத்தை கைவிடவோ அல்லது ஒதுங்கவோ முயலவில்லை.

இன்று ம் இப்பொழுதும் ஈழத்தில் இயக்கங்கள் போராடிக்கொண்டுதான் இருக்கின்றன.

இவர்களை ஏற்றுக்கொள்வதும் விடுவதும் அல்லது கூலிக்குழுக்களாக வர்ணிப்பதுவும் அவரவர் எண்ணத்தைப் பொறுத்தது.

இனவிடுதலைப்போராட்டம் என்பது பலபடிமுறைகளைக்கடந்தும் தன்னைப் புதுக்கியும் செதுக்கியும் முன்னேறும் என்பதை உலக நாடுகளில் நடந்தபோராட்டங்கள் வலியுறுத்துகின்றன.


இதை ஏற்றுக்கொள்ளும் மனத்துணிவின்றி கூலிப்போராட்டம் என்று விபரிப்பது எவ்வாறு கூடும் என்பதை இவர்கள் தான் சொல்ல வேண்டும்.

//ஈழ ஆதரவு பிழைப்புவாதிகளின் விருப்பம் மற்றும் துணையுடன் அத்துமீறி ஆக்கிரமித்த இந்தியா, இதன் மூலம் புலிகளை அவமானப்படுத்தியும் ஈழத் தமிழ்மக்களை படுகொலையும் செய்தனர். இதனால் ராஜீவ் புலிகளால் கொல்லப்பட்டார். இதன் பின் ஈழ ஆதரவு பிழைப்புவாதம் எதிர் நிலைத்தன்மை பெற்றதுடன், புலி எதிர்ப்பு ஆதரவு என்று குறுகி இரண்டு அணிகளாகியது. இங்கு பிழைப்புவாதம் சார்ந்து வெளிப்படையாகவே புலியெதிர்ப்பு, புலியாதரவு என்று தன்னை கன்னை பிரித்துக் கொண்டது. இதற்கூடாக தம் பிழைப்பு வாதத்தை நடத்தத் தொடங்கியது. தமிழ் மக்களை இவை கண்டு கொள்ளவில்லை.//

ஆக "டோலர்கள் " இந்தியாவின் தவறையும் புலிகளின் எதிர் வினையையும் சரி என்று ஒத்துக்கொள்கின்றார்கள் என்று எடுத்துக் கொள்ளலாமா?

அப்படியாயின் புலிப்பாஸிஸம் என்று புலம்புவது வெறும் விளம்பரத்திற்குத்தானா?

//இவ்விரண்டும் இந்திய மேலாதிக்கத்தை அடிப்படையாக கொண்டு இயங்கியதுடன், புலியை ஆதரிக்கக் கோரியது அல்லது எதிர்க்கக் கோரியது. இப்படி புலியைச் சுற்றி இயங்கியது, இந்த பிழைப்புவாதம். இது ஈழத் தமிழ் மக்களையிட்டும், அதன் நலனில் இருந்தும், அன்று முதல் இன்று வரை சிந்தித்தது கிடையாது. தன் சொந்த மக்களை ஏமாற்றி பிழைக்கும் இந்தக் கும்பல், அதே போல் ஈழ மக்களையும் நட்டாற்றில் விட்டுத்தான் பிழைத்தது. //

இந்திய மேலாதிக்கத்திற்கு புலிகள் எதிரானவர்கள் என்ற கருதுகோளின் அடிப்படையில் புலிகளை அழிக்க இந்தியா கங்கணம் கட்டிக்கொண்டிருக்கும் இவ்வேளையில் புலியெதிர்ப்பைப்போலவே புலியாதரவும் இந்திய மேலாதிக்கத்தை அடிப்படையாக கொண்டது என்று எவ்வாறு கூறுகின்றீர்கள்?

ஈழத்தமிழ் மக்களின் உயிரிழப்பு மீதான தமிழக மக்களின் அனுதாபத்தை உங்களால் எவ்வாறு இவ்வாறு கொச்சைப்படுத்த முடிகின்றது.


அப்போ புலியை எதிர்க்கும் நீங்களும் பிழைப்பு வாதிகள் தானா?

இது ஈழத் தமிழ் மக்களையிட்டும், அதன் நலனில் இருந்தும், அன்று முதல் இன்று வரை சிந்தித்தது கிடையாது. தன் சொந்த மக்களை ஏமாற்றி பிழைக்கும் இந்தக் கும்பல்

நீங்களுமா?


சரி அவர்களை விட்டு விடுங்கள். நட்டாற்றில் விடப்பட்ட மக்களைக்கரையேற்ற நீங்கள் என்ன செய்து கொண்டிருக்கின்றீர்கள்.
புலிப்பாஸிஸம் புலியெதிர்ப்பு என்று எழுதுவதன் மூலம் இந்த மக்களுக்கு எப்படி உதவி செய்யலாம் என்று கூற வருகின்றீர்கள்.

புலிகளுடன் செலவழிக்கும் நேரத்தை சிங்கள இன ஒடுக்குமுறையயும் அதனால் தமிழ் மக்களின் துயரங்களையும் வெளிக்கொண்டுவரும் பரப்புரைகளையும் நீங்கள் செய்யலாமே? அதுவே ஒரு வகையில் மக்களின் துயரங்களை குறைப்பதற்காவது வழி கோலும் என்று அறியாதிருக்கின்றீர்களா?

பல "இஸங்"கள் பேசும் உங்களால் இவ்வுலகு இருக்கும் இதே ஒழுங்கில் அதனை எதிர்கொள்வதுவும் அதனை நம் மக்களின் போராட்டத்தின் ஆதரவு திசையில் வளைத்துக்கொள்வதுவும் முடியாத விடயமா ..என்ன?

//இன்று புலிகள் தாம் தப்பிப்பிழைக்க, ஈழ மக்கள் கொல்லப்படுவதாக காட்டி நடத்தும் பலி அரசியலை வலிந்து செய்யத் தொடங்கினர். எவ்வளவு மக்கள் பலியாகின்றனரோ, அதுவே தாம் தப்பிப்பிழைக்கும் அரசியல் பிரச்சாரத்துக்க உதவும் என்பது புலி அரசியல். அதற்கு அமைய மக்களை பலியிட்டு வரும் புலிகள், தமக்கு ஆதரவான இந்திய விஸ்தரிப்புவாதிகளின் துணையுடன் ஈழத்து எழுச்சியை தமிழகத்தில் உருவாக்கினர்.//

அப்போ சிங்கள இராணுவத்தின் குண்டுகளால் தமிழ் மக்கள் இறக்கவில்லையா ? புலிகள் பலி பீடத்தில் வைத்து கழுத்தறுக்கின்றார்களா? அது என்ன எப்போதும் காரணங்களைப் புலிகளுக்கு எதிராக உருவாக்குன்ற உங்களால் உண்மைக்காரணங்களை கண்டறியவே முடியாதா?

அப்போ புலிகள் இதுவரை செய்து வந்த போராட்டம் ஈழ மக்களைக்காத்ததா ? அல்லது அழித்ததா?

//எவ்வளவு மக்கள் பலியாகின்றனரோ, அதுவே தாம் தப்பிப்பிழைக்கும் அரசியல் பிரச்சாரத்துக்க உதவும் என்பது புலி அரசியல். //

இது எப்போது தொடக்கம் புலியரசியல் ஆனது. அப்படியென்றால் ஏறக்குறைய 20 வருடங்களாக புலிகளால் பல காலங்களிலும் விடுவிக்கப்பட்ட பகுதிகளில் விரும்பியோ விரும்பாமலோ வாழ்ந்த மக்களை பலியிட்டுக்கொண்டா இருந்தார்கள்.

அப்போதெல்லாம் எவ்வகை அரசியலை அவர்கள் நடாத்தினார்கள்? அப்படியொரு அரசியலை நடாத்தியவர்களுடனா சர்வதேசமும் பேச்சு வார்த்தை என்று முண்டியடித்தது?

மக்களின் பிரதிநிதிகளாய் இல்லாமல் ஒரு போராளிக்குழுவாகவா அவர்களுடன் பேச்சு வார்த்தை நடாத்தினார்கள்? அப்படி யானால் வேறு எந்த போராட்டக்குழுக்களை வெளிநாடுகளுக்கு அழைத்து பேச்சு வார்த்தைகள் நடாத்தினார்கள்?

தமிழக அரசியல்வாதிகளை இந்த வாங்கு வாங்கிகின்றீர்களே... நீங்களும் அதே அரசியலைத்தானே செய்து கொண்டிருக்கின்றீர்கள். புலிகள் இல்லையென்றால் உங்களுக்கும் எழுதுவதற்கு விடயம் இல்லாது போய்விடுமே?

கம்யூனிஸம் சோஷலிஸம் தான் எழுதுவோம் என்று அடம் பிடித்தால் வாசிப்பதற்குத்தான் ஆள் இல்லாது போகும். ஏனெனில் இப்போது நம் மக்களுக்குத் தேவை "உயிரிஸம்" அதாவது பாதுகாப்பான வாழ்க்கை.

உயிரிற்கே உத்தரவாதம் இல்லாத போது உங்கள் தத்துவங்களை வைத்து குப்பையா கொட்டுவது.

சரி அதை வைத்து மக்களுக்கான வாழ்வாதாரத்தை வழங்கமுடியுமானால் எது எப்படி என்று எழுதுங்கள் மக்களுக்கு வழிகாட்டுங்கள்.

அது எதுவுமே செய்யாது புலிகளைச் சுரண்டிக்கொண்டிருப்பதும் மூளைக்குள் திணித்துக்கொண்ட குப்பைகளை இடைச்சொருகல் இட்டு மேதமைத்தன்மையைக் காட்டுவதும் தான் உங்கள் போராட்டம் என்றால் பாவம் "டோலர்கள்"

//இந்த இந்தியத் தேர்தலை குறைந்தபட்சம் உண்மையான தமிழின உணர்வாளர்கள் யார் என்பதை, அவர்கள் எடுக்கும் முடிவுகள் தான் இன்று தீர்மானிக்கின்றது//

நீங்கள் எழுதியது தான்.

அப்போ இவர்களை எந்தப்பக்கத்தில் சேர்க்கின்றீர்கள்?

"உண்ம்மையான தமிழுணர்வுள்ளவர்களை " தமிழ் மக்களுக்கு எதிரான மகிந்தவின் சிங்கள பேயரசிற்கோ சேலகட்டிய முசோலினி சோனியாவின் பக்கமோ சேர்ப்பீர்கள் ஆனால் நீங்கள் கல்லெறி வாங்குவது தவிர்க்க முடியாதது.

இவர்களை புலி ஆதரவு/ஈழ ஆதரவுப்பக்கத்தில் சேர்த்தால் புலிகளும் அவர்கள் ஆதரவாளர்களும் சரி என்று ஆகின்றது.

நீங்கள் அவர்களுக்கு எதிராக எழுதுவது தவறென்றாகின்றது. உண்மையான தமிழுணர்வு உங்களுக்கு இல்லையென்றாகின்றது.

//இவர்கள் அமைக்கும் எந்தக் கூட்டும், இந்திய விஸ்தரிப்புவாதத்தின் அரசியல் எல்லைக்குள் ஈழத்தமிழனை ஒடுக்கவே செய்யும். இதற்கு மாறாக இந்தப் போலியான பிழைப்புவாத ஆளும் வர்க்கத்தின் தேர்தலை புறக்கணித்து, புரட்சிகரமான வழியில் தேர்தல் பகிஸ்கரிப்பதை தம் அரசியலாக கொண்டு மக்களுக்காக போராடுவது அவசியம். இதன் மூலம்தான், ஈழ தமிழ் மக்களுக்கு, தமிழக மக்கள் அரசியல் உணர்வுடன் உதவிவிடமுடியும். //

உங்கள் கூட்டும் இவர்களுடனா அல்லது உண்மையான தமிழுணர்வாளர்களுடனா?

புரட்சிகரமான வழியில் - அதைத்தான் என்னவென்று சொலுங்களேன் "டோலர்கள்" எங்களுக்கெல்லாம் உங்களைப்போல் அவ்வளவு விபரம் பத்தாதுங்க.

முடிந்தால் புட்டுப்புட்டு வைங்க ..இல்லாவிட்டால் "பித்த" வாந்தியெடுக்கும் பித்தலாட்டங்களை விட்டு விடுவது "தமிழ்" மக்களை தாங்களாகவே முன்னேற வழிவகுக்கும்.